இன்று (21 ஆகஸ்ட் 2022) நான் கங்கைகொண்ட சோழபுரம் செல்லும் அருமையான வாய்ப்பு கிடைத்தது. அப்போது நான் எடுத்த சில படங்களை இந்தப் பதிவில் கீழே பார்க்கலாம்.

வட இந்தியாவில் கங்கை நதி ஓடும் பகுதிகளை ஆண்ட பல அரசர்களை வெற்றி கொண்ட இராஜேந்திர சோழன், கி.பி. 1025-இல் இந்தக் கோவிலைக் கட்டினார். இதற்குத் தேவையான பணம், அவரின் முந்தைய தென்கிழக்கு ஆசியப் படையெடுப்புகளிலிருந்தும் வந்திருக்கலாம் என்று கூறப்படுகிறது. அவரின் கடற்படையைப் பற்றி வழிகாட்டி விவரித்தபோது, அப்போது தமிழகம் (இந்தியாவும்) இவ்வளவு வலிமையான கடற்படையைக் கொண்டிருந்தும், அடுத்த சில நூறு ஆண்டுகளில் எப்படி ஐரோப்பியர்களிடம் தோற்றுப் போனோம் என்பதை எண்ணும்போது மனசு கலங்கியது. காரணங்கள் எல்லோருக்கும் தெரியும், ஆனாலும் ஏற்க முடியவில்லை.

தந்தை முதலாம் இராஜராஜசோழன் கட்டிய தஞ்சை பெரிய கோவிலைவிடச் சிறிது குறைவான உயரத்தில் தான் கங்கைகொண்ட சோழபுரம் கோபுரம் கட்டப்பட்டுள்ளது. தந்தையை மிஞ்சக் கூடாது என்ற மரியாதையினால் என்று கூறப்படுகிறது. பிரிட்டிஷ் ஆட்சிக் காலத்தில், இங்கிருந்த இரண்டு சுற்று மதில் சுவர்களும் பல சிறிய அமைப்புகளும் உடைக்கப்பட்டு, கற்களை அருகே அணை கட்ட பயன்படுத்தியதாக அறிந்து கொள்வது வலியைத் தந்தது. ஆனால் அப்போது வேறு வழி இல்லாதிருந்திருக்கலாம்.

கோவிலின் உள்ளே இருக்கும் சிவலிங்கத்திற்கு மேல் இரண்டு தளங்கள் உள்ளன. ஒவ்வொரு தளமும் சிவனின் ஒரு நிலை, பரிமாணம் என்று வழிகாட்டி விவரிக்கும் போது ஆச்சரியமாக இருந்தது. சோழர்கள் தங்கள் கட்டிடங்களின் வாயிலாகவே ஆன்மிகத்தை வெளிப்படுத்த முயன்றிருக்கிறார்கள் என்று தோன்றியது.

இந்தத் தளத்தை வாழ்நாளில் ஒருமுறையாவது போய் பார்க்க வேண்டும். ஆனால் போகும் முன் கொஞ்சம் இதன் வரலாற்றைப் படித்துவிட்டுப் போவது உங்கள் அனுபவத்தை இன்னும் ஆழமாக்கும். குறிப்பாக, ஒரு நல்ல வழிகாட்டியை அமர்த்திக் கொள்ளுங்கள். ASI ஒப்புதல் பெற்ற உள்ளூர் கைடுகள் இருக்கிறார்கள். ஹோட்டல்களில் கேட்டால் இவர்களின் எண்ணைப் பெறலாம். இல்லையெனில், நாமாகவே பார்த்துவிட்டு வந்தால், இதன் ஆழமான வரலாறும் ஆன்மிகச் சிறப்பும் தெரியாமல், வெறும் பிரமாண்டக் கட்டிடத்தையும் கோபுரத்தையும் பார்த்துவிட்டுத் திரும்பி விடுவோம்.